青心直說：百年一遇奇輪遁甲

[size=5]人誰無過，知錯能改，善莫大焉，絕對唔可以側側膊唔多覺，更加唔可以輸打贏要。講嘅係噚日財經界議論紛紛嘅高佬發行 9月到期行使價 11000點嘅日經 Call輪，咁啱約咗班輪場女將午飯，話題當然係呢宗百年一遇嘅輪界謎團，女性果然細心，兩三道板斧已拆解輪價為何會因一個由「除」變「乘」嘅符號，而賣平 100倍。
喺港交所（ 388）掛牌嘅窩輪同牛熊證超過六千隻，輪商喺發行過程出錯漏唔奇，開錯價亦唔係第一次，之不過一向都係私下低調解決，要靠雙方（輪商與投資者）講數擺平嘅，十居其十都係輪商理虧，最終幾多折找數，好睇輪商嘅誠意能否令對方收順啲。
昨日一開市高佬 4隻日經輪被舞到飛天，港交所點解會容許高佬將 4隻輪齊齊停牌已經好有問題，之後仲俾佢「擅自竄改」上市文件，更加開咗一個極壞嘅先例。將來再有輪商犯錯，唔通又俾佢改嚟改去？


竄改上市文件開極壞先例
當然，喺隻窩輪停牌前已買入嘅投資者，唔排除當中有專業炒家睇準條款漏洞出擊，因為好少人會去摷上市文件睇，仲要識睇成條數學公式，但由於買賣決定係建基於最初嘅上市文件條款，假如停牌後可以彈弓手唔認賬，即係等同於高佬喺交易所默許下，後補改動加工以求撥亂反正，極盡輸打贏要之能事，對投資者非常唔公道。
輪友明白入得場，就預咗要玩自由搏擊，早已視死如歸豁出去，但喺擅改遊戲規則前剩落嘅蘇州屎，就唔可以側側膊，否則肯定會影響商譽。一眾輪商𠵱家要做嘅，當然唔係睇住高佬點死同幾時死，而係要拿拿臨摷番啲出世紙， Check清楚自己有冇計錯寫錯睇漏眼，否則他朝君體也相同，負責把關閒閒哋收十萬八萬上市費嘅港交所亦責無旁貸。
胡孟青
[/size]